Ao día seguinte, xoves 27, celebrarase unha nova edición do Festival Pétalos de Igualdade co grupo Cantometrics e o dúo Barahúnda
O Concello da Coruña programou para esta próxima semana dúas citas musicais gratuítas, seguindo a liña do Goberno de Inés Rey de dinamizar os espazos culturais da cidade con programación para todos os públicos.
A primeira delas terá lugar este mércores 26 de xullo, cun concerto gratuíto da cantante Verónica Codesal. A artista presenta o seu novo disco ‘100 voltas’ que define como un proxecto cargado de cultura e tradición galega, cun repertorio marcado pola esencia do pasado e a súa combinación con elementos contemporáneos. Conta, ademais, con colaboracións de poetas galegas contemporáneas como Lucía Aldao, Yolanda Castaño, Rosalía Fernández Rial ou Brais Fernandes. A entrada é de balde ata completar capacidade e as portas abriranse ás 20.15 horas.
Ao día seguinte, xoves 27, o Centro Ágora aocllerá a segunda das citas programadas cunha nova edición do Festival Pétalos de Igualdade. O festival desenvólvese no marco da programación Agra no Ágora, un ciclo de actividades organizado pola Asociación Veciñal Agra do Orzán e o Concello da Coruña, seguindo co obxectivo de levar a cultura aos distintos barrios da cidade. Son con entrada libre ata completar capacidade. As portas abriranse ás 20.00 horas.
‘Pétalos de igualdade’ contará cun doble concerto de Cantometrics e o dúo Barahúnda, dúas propostas folk que viaxan á música de raíz. Barahúnda, fundada por Helena de Alfonso e José Lara Gruñeiro, comenzaron o proxecto no 1998 en Madrid, cidade da que son orixinarios. Desde 2010 residen en Galicia, onde gravaron os seus últimos traballos, e este ano celebran o seu 25 aniversario. Pola súa banda, Cantometrics está formada por Marina Vigo, Luís Bolón, Sandra Pérez , Nébeda Piñeiro e Iago Camaño. Cinco músicos galegos de ampla traxectoria que compaxinan a súa actividade artística en grupos como Sondeseu, Néboa ou Os Melidaos.
